قرم وفقير....!!!!!!!!!!!!!!
منك العذر وعليا المعذره..
لاتحسب حساب هجر ولا هجير
كل ذنب بتذنبه بستغفره
واحد مايعذرك مافيه خير
دور بصدري وطن واستعمره
عندك من الضلع الأول للأخير
عيش فيني وادمر اللي تدمره
واعتذرلي واعتبر سرك في بير
لاتبشرني بجرح وتذخره
لاتعشمني بفرح وتستخير
ولا تنومي بليل وتسهره
ولاتنام والا انا جفني سهير
خلني مثل النجوم مبعثره
عيش فيني لا شهيق ولا زفير
لاتقول العفو عند المقدره
خل قلبك صلب وحسابك عسير
المسامح والزعل للمبزره
ولا انا لا زعول ولا صغير
ودي ادري ليه للحزن ثمره
ودي اقطف من قساوتك العبير
ودي اجفل من فراقك واحذره
ودي اعرف لو زعلت ايش يبي يصير
لو تقدر خاطري صدق اكسره
لو صحيح تحبني لا تستشير
ازرع بقلبي سبب يستنفره
اثبت انك غير وان الناس غير
شاعرك ماكل بنت تجرجره
حارت به عقول ناس ماتحير
النساء ماحركوا فيه اشعره
ثار عشق ومالقى شي يثير
لو سكت شفت الوقار في منبره
وان تكلم زمهرير بزمهرير
مايحضر الا القلوب مجمهره
ومايغيب الا وعشاقه كثير
ان هجرته تستقر بمحجره
وان تبعت رضاه ماعينت خير
اعشقه لكن بعد ماتقهره
ابتسمله بس لاشفته كسير
حن لكن حن لا جبت خبره
حب لكن خل حبك بالاخير
لو عطيته وجهك اعطاك اظهره
صد عنه يتبعك مثل الضرير
لا تحاول تكسبه ماتخسره
صير ثلج يصرلك مثل السعير
ماتميل الا الغصون المثمره
ومايسيل من الجروح الا الغزير
من قبل لاتنقهر منه اقهره
قبل لايستحقرك خلك حقير
اسكنه حرك جموده بعثره
اعشق اكره عاتب اشره حن غير
انثره لملمه..لملمه انثره
صد ياخي طير لو تقدر تطير
من متى وانا اتحرالي مره
تثبت اني لا وقعت اوقع كبير
ابكي انا مقطوع من غصن اشجره
لاصديق ولا رفيق ولا عشير
ابدوي شيب الصبر اشعره
ماعرف ريش النعام ولا الحرير
ان غفى كن السحاب يدثره
وان صحى يفرش من الرمله حصير
ماخذن من قسوة البيد اكثره
ومن شموخ البدو شرا مستطير
جنته صحراه والشوك ازهره
والسراب بنظرته مثل الغدير
ان فزع يامشجعه يامغفره
من خلقه الله وهو قرم وفقير
كان ماتقدره قل ماتقدره
صير غالي صدق والا لا تصير
الغلا اللي ماتزعزعه اهجره
دام قلبك لايجار ولا يجير
شوفلك رجل بليد استحقره
واجد اللي يعشقون بلا ضمير
بس انا لو جبتلي مية مره ماتحرك فيي شعره لو تطير..