الليل والغربـه وتوهـات الانسـان
جمعتها من شـان خاطـر عيونـك

بسطت لك رمض الثرا ورد ريحان
لامن مشيـت الكـل مايغمرونـك

والشمس فوقي وانت متظلل بشـان
تامر وتنهـا صعـب مايامرونـك

سقيتني شين المـراره والأحـزان
قطفتنـي وردن تفرعـن يصونـك

وانا قطفتك زيـف غشـن وبهتـان
مالـوم غيـري يـوم مايقطفونـك

جيتك وفا انسان واصبحت خـوان
وشلون تطعن من يحـرم يخونـك

ولعتلي من واهـج النـار بركـان
يثور وأحجار الأسـف يرجمونـك

مع السلامـة دام مافيـه نقصـان
الراس عالي يكفي اعيـش دونـك

خسران لا والله مانيـب خسـران
جمري طفا وأشعلت جمرة طعونك

خلك بعيد! أرجوك! في ماضين كان
خل التعب واعيش أحسـن بدونـك

مرتاح متهني فـي حبـي وهيمـان
مابيك لونـك لـو توفـي ديونـك

بتموت في غيضك وبتموت حقران
هذي جزاتك شوف! من يخدعونـك

والليل والغربه وتوهـات الانسـان
كانت حياتي يـوم اناظـر عيونـك